ਗ਼ਜ਼ਲ

ਹਰ ਮਹਿਫਲ ਵਿੱਚ ਹਾਜਰੀਆਂ ਲਗਵਾਈ ਚੱਲ 
ਟੁੱਟੇ ਭੱਜੇ,ਵਿੰਗੇ ਟੇਢੇ,ਅੱਖਰ ਚਾਰ ਸੁਣਾਈ ਚੱਲ 


ਕਿਸੇ ਸ਼ਾਇਰ ਦੀ ਰਚਨਾ ਸੁਣਨ ਦੀ ਲੋੜ ਨਹੀਂ 
ਬਸ ਇੰਡ ਤੇ ਆਕੇ, ਤਾੜੀ ਖੂਬ  ਵਜਾਈ  ਚੱਲ 


ਖੱਟੀ ਚੱਲ ਵਾਹ ਵਾਹ, ਸ਼ੇਅਰ ਸੁਣਾ ਕੇ ਚੋਰੀ ਦੇ 
ਬੇ ਸ਼ਰ੍ਮੀ ਨਾਲ  ਬੁੱਲੀਆਂ ਵਿੱਚ ਮੁਸਕਾਈ ਚੱਲ 


ਨਜ਼ਮ, ਲੇਖ  ਵਿੱਚ  ਫਰਕ  ਜੇ ,ਤੈਨੂੰ ਲਭੇ  ਨਾ 
'ਸੋਹਣੀ ਰਚਨਾ' ਕਹਿ ਕੇ, ਡੰਗ  ਟਪਾਈ  ਚੱਲ 


ਬਣ  'ਸੰਪਾਦਕ'  ਓਨਲਾਈਨ  ਇੱਕ  ਪੇਪਰ ਦਾ 
ਕੱਚਾ ਪਿੱਲਾ ਜੋ ਵੀ ਹੋਵੇ,ਉਸਦੇ ਵਿੱਚ ਸਮਾਈ ਚੱਲ 


ਪਰਵਾਹ ਨਾ ਕਰ, ਕਿਸੇ ਨਾਢੂ ਖਾਂ ਹਰਵਿੰਦਰ ਦੀ      
ਤੂੰ,  ਤੋਰੀ  ਫੁਲਕਾ, ਚਲਦਾ ਜਿਵੇਂ,  ਚਲਾਈ  ਚੱਲ ......................ਹਰਵਿੰਦਰ ਧਾਲੀਵਾਲ 

ਗ਼ਜ਼ਲ

ਮਾਰ ਲਿਆ ਰੁੱਸਵਾਈਆਂ  ਨੇ 
ਤੇਰੀਆਂ ਬੇ ਪਰਵਾਹੀਆਂ  ਨੇ 


ਸਾਡੀ ਝੋਲੀ ਦੇ ਵਿੱਚ ਪਈਆਂ
ਲੰਮੀਆਂ ਬਹੁਤ ਜੁਦਾਈਆਂ ਨੇ 


ਤੇਰੇ  ਨਾਂ ਦਾ ਪੱਥਰ ਗੱਡਿਆ 
ਮਿਲ ਜੁਲ ਕੇ ਸਭ ਰਾਹੀਆਂ ਨੇ 


ਰੌਨਕ ਲੈ ਗਿਓਂ ਨਾਲ ਆਪਣੇ
ਜਿੰਦ ਘੇਰ ਲਈ ਤਨਹਾਈਆਂ ਨੇ 


ਡੌਰ ਭੌਰ ਜੀਆਂ ਝਾਕੀ ਜਾਵਣ 
ਸਧਰਾਂ ਹੁਣ  ਬੁਖ੍ਲਾਈਆਂ  ਨੇ 


ਨੈਣੀਂ  ਪਾ  ਯਾਦਾਂ ਦਾ  ਕਜਲਾ 
ਘਟਾ ਕਾਲੀਆਂ ਚੜ ਆਈਆਂ ਨੇ 

ਤੇਰੇ ਕੀ  ਸੀ ਵੱਸ  ਹਰਵਿੰਦਰਾ 
ਜਦ  ਤਾਰਾਂ ਧੁਰ ਤੋਂ ਆਈਆਂ ਨੇ ..............ਹਰਵਿੰਦਰ ਧਾਲੀਵਾਲ 

ਗ਼ਜ਼ਲ

ਸਦੀਆਂ  ਦੇ ਸੂਰਜ਼  ਯਾਰੋ ,ਅਸੀਂ ਪਿੰਡੇ ਉੱਤੇ ਸੇਕੇ ਨੇ 

ਮੈ ਸ਼ੂਕਦੇ ਦਰਿਆਵਾਂ ਦੇ ਵੀ  ,ਰੁੱਖ  ਬਦਲਦੇ ਵੇਖੇ ਨੇ  

ਘੱਟੋ  ਘੱਟ ਤੂੰ ਦਾਤੀ  ਵਾਲੇ ,ਦੰਦੇ  ਤਾਂ ਕਢਵਾ ਨਵੇਂ ,

ਚੋਰੀ ਛੁੱਪੇ ਦੁਸ਼ਮਣ ਨੇ ਤਾਂ ,ਚਾਕੂ  ਛੁਰੀਆਂ  ਰੇਤੇ ਨੇ 

ਹੁਣੇ ਹੁਣੇ ਨੇ ਬੈਠੀਆਂ ਆ ਕੇ, ਹਰੀ  ਕਚੂਰ ਡੇਕ ਉੱਤੇ 

ਬਾਜਾਂ ਦੀ ਵੀ ਬੂਥ ਲੁਆਤੀ,ਚਹੁੰ ਚਿੜੀਆਂ ਦੇ ਏਕੇ ਨੇ 

ਰੁਮ੍ਕਦੀਆਂ ਪੌਣਾਂ ਨੇ ਜਦ ,ਰੂਪ ਧਾਰਿਆ  ਝੱਖੜ ਦਾ 

ਸੰਗ ਉੱਡ ਕੇ  ਸਾਥ ਹੈ  ਦਿੱਤਾ ,ਮਾਰੂਥਲ  ਦੇ ਰੇਤੇ ਨੇ 

ਠੰਡੀਆਂ ਸ਼ੀਤ ਹਵਾਵਾਂ ਨੇ ,ਅੰਦਰ ਗਰਮ ਚੁਆਤੀ ਵੀ 

ਗਰਮ ਸੁਆਸਾਂ ਅੱਗੇ  ਠੰਡ ਨੇ ,ਗੋਡੇ  ਆਖਰ ਟੇਕੇ ਨੇ 

ਕਿਓਂ ਹਰਵਿੰਦਰ ਭੁੱਲ ਗਿਆ ਤੂੰ, ਦਸਤਕ ਦੇਣੀ ਬੂਹੇ ਤੇ 

ਸੌ ਸਾਲ ਸਾਨੂੰ  ਪਿਛੇ ਸੁੱਟ ਤਾ ,ਓਏ  ਤੇਰੇ ਮਾੜੇ ਚੇਤੇ ਨੇ ......................ਹਰਵਿੰਦਰ ਧਾਲੀਵਾਲ 

ਗ਼ਜ਼ਲ

ਹੈ ਨਹੀਂ ਕੋਈ ਹਿਸਾਬ ਹਾਕਮ ਦੇ ,ਝੂਠਾਂ ਅਤੇ ਫਰੇਬਾਂ ਦਾ 

ਸਾਨੂੰ ਤਾਂ ਬਸ ਪਤਾ ਹੈ ਯਾਰੋ  ,ਖਾਲੀ ਹੁੰਦੀਆਂ  ਜੇਬਾਂ ਦਾ 

ਵਿੱਚ  ਬਜ਼ਾਰੀਂ  ਜੇਰਾ ਕਰ ਕੇ ,ਆਇਆ ਕੰਮ  ਤੋਂ ਮੁੜਦਾ 

ਅੱਗੇ ਲੰਘ ਗਿਆ ਮੁੱਲ  ਪੁੱਛ ਕੇ ,ਬਿੱਲੂ  ਮਜਬੀ  ਸੇਬਾਂ ਦਾ 

ਬਘਿਆੜਾਂ ਨੇ ਖਿੱਚੀ ਰਲ ਕੇ ,ਹੈ ਲਛਮਣ  ਰੇਖਾ ਵਾੜੇ ਤੇ 

ਚਿਟਿਓਂ ਕਾਲਾ ਰੰਗ ਹੋ ਗਿਆ,ਖੜੀਆਂ ਖੜੀਆਂ ਭੇਡਾਂ ਦਾ 

ਕੁਝ ਨੋਟਾਂ ਦੇ ਬਦਲੇ ਰੁਲ੍ਣੀ ,ਫੇਰ ਇਜ਼ਤ ਹੈ ਕਿਰਤੀ ਦੀ 

ਹੁਣ  ਫੇਰ ਹੋਣਗੇ  ਰਾਜੀਨਾਮੇ ,ਤੇ ਮੁਢ   ਬਝਣਾ ਝੇਡਾਂ ਦਾ 

ਮਹਿਫਲ ਚੋਂ ਉਸਦੀ  ਯਾਰੋ ,ਪੱਲੇ  ਤਾਂ  ਕੁਝ  ਪਿਆ ਨਹੀਂ 

ਯਾਦ ਹੈ  ਬਸ ਸ਼ੋਰ ਸ਼ਰਾਬਾ ,ਤੇ ਥੱਪ-ਥ੍ਪਾਉਣਾ ਮੇਜਾਂ ਦਾ 

ਨੇਤਾ ਦੀ ਗਲਵਕੜੀ  ਨੂੰ ,ਦੱਸ ਰਿਹਾ ਉਹ ਹੁੱਬ,, ਹੁੱਬ ਕੇ

ਕੀ ਭੇਤ   ਹਰਵਿੰਦਰ  ਤਾਈਂ , ਵੋਟ ਰੁੱਤ  ਦੀਆਂ ਖੇਡਾਂ ਦਾ .........................ਹਰਵਿੰਦਰ ਧਾਲੀਵਾਲ 

ਗ਼ਜ਼ਲ

ਆਓ ਸਾਰੇ ਸੁਪਨਾ ਹੋ  ਗਏ , ਸੁੱਖਾਂ  ਦੀ  ਗੱਲ  ਕਰੀਏ 

ਡੈਣ ਵਾਂਗਰਾਂ ਝਪਟਣ  ਵਾਲੇ, ਦੁੱਖਾਂ ਦੀ  ਗੱਲ  ਕਰੀਏ 

ਪਾਉਣ ਵਲੇਟੇ ਇੱਕ ਦੂਜੀ ਨੂੰ,ਆਂਦਰਾਂ ਉਸਦੀਆਂ ਖਾਲੀ 

ਕੁਰਬਲ ਕੁਰਬਲ ਕਰ ਰਹੀਆਂ, ਭੁੱਖਾਂ ਦੀ ਗੱਲ ਕਰੀਏ

ਜਨਤਾ ਤਾਂ ਹੈ ਗਊ  ਵਿਚਾਰੀ ,ਜਨਤਾ  ਨੇ ਕੀ ਕਹਿਣਾ 

ਲੀਡਰ,ਕਲਮਾਂ ਰਲ  ਬੈਠ ਕੇ, ਲੁੱਟਾਂ ਦੀ  ਗੱਲ  ਕਰੀਏ 

ਹਰੇ ਭਰੇ  ਸੀ  ਕਿਸੇ  ਸਮੇ  ਜੋ , ਗੂੜੀਆਂ  ਛਾਵਾਂ  ਦਿੰਦੇ 

ਮਹਿਲਾਂ ਦੇ ਦਰਵਾਜੇ  ਬਣ ਗਏ, ਰੁੱਖਾਂ ਦੀ ਗੱਲ ਕਰੀਏ 

ਵਰਿਆਂ ਦੀ ਗਿਣਤੀ ਵਿਚੋਂ ,ਨਹੀਂ ਲਭਣੇ 'ਅਧ' ਗੁਆਚੇ 

ਅੱਜ ਬੈਠੋ  ਮੇਰੇ ਕੋਲ  ਸਾਰੀਆਂ, ਰੁੱਤਾਂ ਦੀ ਗੱਲ ਕਰੀਏ 

ਦੁਧ  ਮਲਾਈਆਂ ਵਰਗੇ  ਚੇਹਰੇ, ਵੇਖੇ  ਬੜੇ ਹਰਵਿੰਦਰ 

ਆ, ਝੁਰ੍ੜੇ, ਘੋਰ ਉਦਾਸੇ  ਹੋਏ , ਮੁੱਖਾਂ ਦੀ  ਗੱਲ ਕਰੀਏ .....................ਹਰਵਿੰਦਰ ਧਾਲੀਵਾਲ